Meän tehtävä oon ette estää väkivaltaa
Försääkrinkikassan tehtävhään kuuluu ette vastustaa miehitten väkivaltaa vaimoja kohitti, väkivaltaa likhiisessä suhtheessa ja kunnialiittyvvää väkivaltaa ja sortamista. Ette pystyä auttamhaan sinua joka olet joutunu semmosen kohtheeksi met tarttema saaja tiethoon jos sulla oon semmosia kokemuksia.
Tehtävällä oon lähtökohta muun muassa FN:in konvensuunissa ihmisoikeuksista, Euroopparaatin konvensuunissa ihmisoikeuksista, Istanbulkonvensuunissa, Agenda 2030:ssa ja ruottalaisessa lakisäätänössä.
Försääkrinkikassa pittää eesauttaa ette tasa-arvopolittiset päämäärät saavutethaan ja ette tasa-arvointekreerinki pittää olla pääasialinen stratekii ette totheuttaa net. Oon kansa olemassa kansalinen stratekii ette estää ja vastustaa miehitten väkivaltaa vaimoja kohitti, ja meän tehtävä oon ette olla matkassa siinä stratekiissä.
Sen lisäksi tullee esile ette Försääkrinkikassa pittää totheuttaa eri toimia aluheela viraston ohjeessa, rekleerinkipreivissä ja erikoisissa hallitustehtävissä.
Miksis se oon tärkeätä kertoa?
Väkivallan uhriin iskee monesti vakava epäterhveys ja ette net menettävät työn ja sisäletulon. Väkivaltaa essiintyy kaikissa yhtheiskuntaryhmissä ja kaikila yhtheiskuntatasoila. Ette oon kokemuksia väkivallasta elikkä loukkauksista saattaa tarkottaa suuria rajotuksia ja kärsimistä ja saattaa aiheuttaa suurta vahinkoa, niin psyykkisesti ko fyysisesti. Kaikila oon oikeus ellää elämää vaphaasti ilman väkivaltaa ja sortamista. Sitä oon olemassa apua ja ensimäinen askel jos sie itte olet kohtheena oon ette kertoa sinun kokemuksista jollekki henkilölle elikkä virastolle joka saattaa auttaa sinua.
Jokku ryhmät saattavat olla erityisen haavottunheessa tilantheessa seurauksenna syrjinän ja syrjäytymisen seurauksesta. Se saattaa olla henkilöistä joilako oon toimintarajotus, nuoremista ja vanheemista vaimoista, hbtqi-henkilöistä, elikkä henkilöistä joilako oon ulkomaalainen tausta.
Mitäs Försääkrinkikassa saattaa tehhä?
Försääkrinkikassa tekkee aktiiviä työtä ette kysyä kysymyksiä väkivallasta korvauksissa aktiviteettikorvaus, rehapiliteerinkikorvaus ja elatustuki. Sen met tehemä sen takia ette sie, ko sulla oon kokemuksia väkivallasta, piät saaja informasuunia ja viittausta eemäs sinne jostako sie saatat saaja oikeata apua ja tukea.
Jos sie olet sairas elikkä jos sulla oon toimintarajotus sie saatat saaja apua ette yhtheensovittaa rehapiliteeraavia toimia niin ette sie saatat alkaa töihiin elikkä löytää muun tehtävän. Jos sulla oon elatustuki, se ette olla väkivallan kohtheena saattaa tarkottaa ette sulla oon jatkuva oikeus elatustukheen. Ette kertoa väkivallasta oon ensimäinen askel tukheen ja muutoksheen.
Sulla oon oikeus vaphaasheen elähmään jossako ei ole väkivaltaa